Նվիրատվություն

Մենք միշտ առաջնահերթություն ենք տվել երիտասարդ սերնդի կրթության և մշակույթի զարգացմանը։ Մեր արվեստի դպրոցը գոյություն ունի իր հիմնադրումից՝ 1991թ.-ից ի վեր։ Այն Հայաստանի հոգևոր քաղաք Էջմիածնում և նրա հարակից համայնքներում ապահովել է արտադպրոցական կրթություն և մասնագիտական հմտությունների զարգացում ավելի քան 10000 երեխաների համար, այդ թվում՝ հաշմանդամների, ծնողազուրկների և կարիքավորների: Մեր դպրոցի շատ շրջանավարտներ մեծ հաջողություններ են գրանցել տարբեր ոլորտներում՝ օգտագործելով կենտրոնից ձեռք բերած հմտություններն ու փորձը: Նրանց տրվում է նաև աշխատանքի հնարավորություն հենց մեզ մոտ։

Այստեղ, սիրառատ և ջերմ միջավայրում երեխաները կարող են լինել ստեղծագործ և զվարճանալ, միևնույն ժամանակ զարգացնել հմտություններ, որոնք կօգնեն նրանց ընտրել իրենց մասնագիտությունն ու տեղափոխվել դեպի իրենց ապագան: Մենք պայմաններ ենք ստեղծում անհատականության և յուրաքանչյուր երեխայի յուրահատուկ ճաշակի, տեսլականի և ստեղծագործական զարգացման համար: Առաջարկում ենք նկարչության, խեցեգործության, ազգային խոհանոցի, գորգագործության, դերասանական արվեստի, վոկալի, պարի, դհոլի, շախմատի, համակարգչային և ռոբոտաշինության դասընթացներ, ինտերակտիվ խաղեր և վարպետության դասեր, ինչպես նաև կազմակերպում ենք տարբեր մշակութային միջոցառումներ: Մեզ մոտ գործում է նաև Արտթերապիայի խմբակ, որտեղ տարեկան շուրջ 150 երեխա ստանում է հոգեբանի, լոգոպեդի, էրգոթերապիստի անվճար աջակցություն։ Մենք հարգում ենք յուրաքանչյուրի անհատականությունն ու ինքնատիպությունը և խրախուսում ենք յուրաքանչյուր երեխայի ինքնարտահայտումը: Մենք կարծում ենք, որ պետք է սկսենք ազգային և համամարդկային արժեքների առաջխաղացումը և ձևավորել կիրթ և իրազեկված հասարակություն, որպեսզի բարելավենք մեր կեցությունը և ապահովենք մեզ համար լուսավոր ապագա: Մենք հավատում ենք, որ կգա մի օր, երբ ողջ հայության արևը մի տեղից կծագի։

“ՄՇԱԿՈՒԹԱՅԻՆ ՊԱՏԵՐԱԶՄԸ ԶԻՆԱԴԱԴԱՐ ՉԻ ՃԱՆԱՉՈՒՄ”
ԳՐԻԳՈՐ ՄԱՉԱՆԵՆՑ ԲԱԲԱԽԱՆՅԱՆ