Հայ Միասնության Խաչ

ՀԱՅ ՄԻԱՍՆՈՒԹՅԱՆ ԽԱՉ ԲՄՀԿ-Ի ԱՌԱՔԵԼՈՒԹՅՈՒՆԸ

Աջակցել քաղաքացիական ակտիվ դիրքորոշում ունեցող, կիրթ, իրազեկ, հայրենասեր,   ազգային և համամարդկային արժեքներ կրող քաղաքացու ձևավորմանը և նրա սոցիալական վիճակի բարելավմանը՝ առանձնահատուկ ուշադրություն դարձնելով խոցելի խմբերին:
Նպաստել հայրենիքի և սփյուռքի գործուն կապի ամրապնդմանը:

ԳՈՐԾՈՒՆԵՈՒԹՅՈՒՆԸ

      Հայ Միասնության Խաչ բարեգործական-մշակութային հասարակական կազմակերպությունը (ՀՄԽ ԲՄՀԿ) իր գործունեությունն սկսել է 1987թ.-ին։ 1991-ին ՀՄԽ ԲՄՀԿ-ն գրանցվեց պաշտոնապես` դառնալով նորանկախ Հայաստանի Հանրապետության առաջին հասարակական կազմակերպություններից մեկը:
      ՀՄԽ ԲՄՀԿ-ն մշտապես առաջնային է համարել կրթության և մշակույթի դերը աճող սերնդի զարգացման և կայացման գործում, իր գործունեության ընթացքում իրականացրել է բազմաթիվ կրթական, մշակութային, սոցիալական, իրազեկման ծրագրեր, որոնք ուղղված են եղել շահառուների և նրանց ընտանիքների բարօրությանը, զարգացմանը և քաղաքացիական հասարկության ձևավորմանը, այդ գործընթացին մասնակից դաձնելով նաև երեխաների ընտանիքներին և համայնքի անդամներին, ինչը նպաստում է ծրագրերի արդյունավետության բարձրացմանը:
      2003 թվականից ՀՄԽ ԲՄՀԿ-ն որդեգրել է կրթություն արվեստի միջոցով մեթոդը և նախատեսում է շարունակել այս մեթոդի կիրառումը` կատարելագործելով և ընդլայնելով գործունեության շրջանակները: Կարևորելով երեխայի անհատականության դրսևորման և զարգացման գործընթացը, ՀՄԽ ԲՄՀԿ-ն իր սանին ցանկանում է տեսնել ոչ միայն արվեստի կամ արհեստի մեջ մասնագիտացած, այլ քաղաքացիական ակտիվ դիրքորոշում ունեցող, պատասխանատու և իրազեկ քաղաքացի: Այս պահին ՀՄԽ ԲՄՀԿ-ի Մաչանենց կրթահամալիրում սովորում է շուրջ 700 սան, որոնց մեծ մասը՝ անվճար հիմունքներով։
Մաչանենց կրթահամալիրում անցկացվում են նկարչության, կավագործության, գորգագործության, ազգային խոհանոցի, երգի, պարի, դհոլի, դերասանական արվեստի, շախմատի դասեր։ ՀՄԽ ԲՄՀԿ-ն հիմնել է Ինովացիոն կենտրոն, որտեղ անցկացվում են համակարգչային դասընթացներ։ Այստեղ գործում են նաև ռոբոտաշինության, լուսանկարչության և այլ խմբակներ։ 
ՀՄԽ ԲՄՀԿ-ում առկա է Մարմնամտային առողջության (Արտթերապիայի) կենտրոն, որտեղ ավելի քան 100 երեխա ստանում է հոգեբանի, լոգոպեդի, էրգոթերապիստի անվճար աջակցություն առկա և հեռավար տարբերակներով (Հայաստանի տարբեր մարզերի երեխաների համար)։
      Հայ Միասնության Խաչը յուրաքանչյուր տարի կազմակերպում է Մաչանենց արվեստի միջազգային սիմպոզիում, որին հրավիրվում են արվեստագետներ աշխարհի բազմաթիվ երկրներից։ 
2010 թվականին ՀՄԽ ԲՄՀԿ-ն հիմնեց «Մաչանենց տուն» սոցիալական ձեռնարկությունը, որը գործում է Էջմիածին քաղաքում։ Սոցիալական ձեռներեցության աշխատանքների արդյունքում Էջմիածնում գործող «Հայ Միասնության Խաչ» բարեգործական մշակութային հասարակական կազմակերպությունում բացվել են մշակութային օջախներ` արվեստաց դպրոց, թատրոն, մանկական պատկերասրահ, Միջազգային  պատկերասրահ, թանգարան, սոցիալական ռեստորան՝ ազգային խոհանոցով, գինետուն,  գինու արտադրություն, հուշանվերների սրահ, որտեղ ցուցադրվում և վաճառվում են վարպետների ձեռագործ աշխատանքներ և այլն:
        Ընկերությունը կազմակերպում է հյուրընկալություններ, վարպետության դասեր զբոսաշրջիկների համար, տարածքում գործում է նաև Արտ հյուրանոց և Հյուրատուն, որտեղ հյուրերն անցկացնում են իրենց հանգիստը՝ ընտրելով թեմատիկ սենյակներից որևիցե մեկը։ Սոցիալական ձեռնարկությունում աշխատում են նաև սահմանափակ կարողություններով անձիք։
2019 թվականի հունիսին Մաչանենց տանը բացվեց «Հին օրերի երգը» սոցիալական ռեստորանը, որտեղ աշխատում և մատուցում են 63 տարեկան և բարձր անձիք, իսկ ռեստորանը կահավորված է  վերջիններիս տունը հիշեցնող տեսքով։
«Մաչանենց տուն» սոցիալական ձեռնարկության գործունեությունից գոյացած հասույթն ուղղվում է ՀՄԽ ԲՄՀԿ կրթահամալիրի կայուն գործունեությանը և այլ բարեսիրական ծրագրերին։ (Կատարել նվիրատվություն →)

Հեռ․՝ 094045610
Հասցե․՝ ք․Էջմիածին, Շահումյան 36
Էլ․ հասցե․՝ info@cau.am