Մաչանենց գորգեր և կարպետներ

Գորգագործական արվեստը Հայաստանում շատ հին պատմություն ունի: Այն մյուս ազգերի գորգարվեստից առանձնանում է իր գունագեղարվեստական հորինվածքով, տեխնիկայով և ստեղծագործական մտքերով՝ հիմնականում արտահայտելով երկրաչափական տիպի պատկերներ:
Ձեռագործ գորգերի արտադրությունը երկարատև, դժվարին, համակարգված, մեղվաշխատանքին բնորոշ մի աշխատանք է: Այդ է պատճառը, որ դեռևս հնագույն ժամանակներից ձեռագործ գորգերը եղել են հարգված, պատվաբեր, գնահատելի, արժեքավոր և վերջապես էկոլոգիապես մաքուր և առողջարար կենցաղում օգտագործելու համար: Ըստ ուսումնասիրությունների, այն տներում, որոնցում պահպանվել էին պատմական գորգերը, երեխաներն ավելի առողջ են եղել: Որովհետև գորգը կենսական էներգիա է փոխանցում: Գորգագործն իր ամբողջ էներգիան ու ջերմությունը կապերի, հանգույցների միջոցով փոխանցում է գորգին:
Գորգը, առավել քան մյուս արվեստները, հրաշալի կարողացել է պահպանել մեր կրոնական հավատալիքների բազմաշերտությունը: Գորգագործն այնպես հնարամտորեն է խաչաձևում քրիստոնեական և հեթանոսական հասկացությունները, որ կարելի է այն յուրացնել որպես մտածողության դասական օրինակ: Դրանով նա ակամայից կատարում է գիտական աշխատանք՝ միաժամանակ հարստացնելով մարդու երևակայությունը:
Թերևս մեր օրերում գորգագործությունը, լինելով միանշանակ ազգային ինքնությունը պահպանողը, ինչպես նաև ժողովրդի հոգևոր էներգիայի կրողն ու փոխանցողը, ազգային արվեստների ամենաանտեսված ճյուղերից է:  
ՀՄԽ-ում գորգագործության խմբակը հիմնադրվել է 1996 թվականին Ջինիշյան Հիշատակի Հիմնադրամի կողմից և մինչ այսօր հաջողությամբ գործում է: Խմբակն իր գործութնության ընթացքում ունեցել է 210 սան, որոնց մի մասը, ձեռք բերելով գորգագործի մասնագիտություն, հաջողությունների են հասել այս բնագավառում և կարողանում են որոշակի ֆինանսական աջակցություն ցուցաբերել իրենց ընտանիքներին:
ՀՄԽ ԲՄՀԿ-ն մի շարք ծրագրեր է իրականացնել  Դպրաբակում, Ձորավանքում, Այգուտում, Գետիկում էկո գորգերի ստացման համար՝ դրանով նպաստելով տարեցների և կանանց սոցիալականացմանը։ 
Ծրագրերով նախատեսված է եղել ստանալ առանց ներկանյութերի օգտագործման բնական թելից էկոլոգիապես մաքուր գորգ: Էկո գորգի ստացման համար բուրդը ձեռք է բերվել հիմնականում Գեղարքունիքի և Շիրակի մարզերից: Քանի որ, ըստ Ավստրիայում կատարված լաբորատոր ուսումնասիրությունների, այդ տարածքներում աճեցվող ոչխարների բուրդը պարունակում է մեծ քանակությամբ լանոլին, որը շատ առողջարար է մարդու համար:
Բրդից թելի ստացումը կատարվել է  ավանդական մեթոդներով՝ տնայնագործական եղանակով: Նշված համայնքների ընտրությունը պայմանավորված է այդ համայքներում ճախարակի և իլիկի միջոցով թել մանելու հմտություն ունեցող տարեցների առկայությամբ: Ինչպես նաև այդ համայնքներում գործազրկության շատ բարձր մակարդակով: 
Ծրագրի շրջանակներում գործվել են էկոլոգիապես մաքուր գորգեր: Գորգերի էսքիզների հիմքում հիմնականում դրվել են հայկական ժայռապատկերներ և աբստրակտ նկարներ:
Գորգերը ներկայացվել են ցուցահանդես վաճառքներում, իսկ վաճառքից ստացված հասույթը տրամադրվել է  նոր գորգերի ստեղծման համար:

   

ՀՄԽ-ի իրականացրած ծրագրերը գորգագործության, կարպետագործության և ճախարակագործության ոլորտում՝

1996թ․ Գորգագործության խմբակի հիմնում – Ջինիշյան Հիշատակի Հիմնադրամ
2007թ․ Գորգագործության և նկարչության ուսուցում Հայ Միասնության Խաչ ԲՄՀԿ-ի Արվեստի Կենտրոնում - Ջինիշյան Հիշատակի Հիմնադրամ
2010թ․ Տարեցների սոցիալականացում և ավանդական մեթոդով ստացված թելից էկո գորգի ստացում - Հայկական Կարիտաս ԲՀԿ
2011թ․- Կանանց սոցիալականացում ավանդական արհեստների միջոցով - Հայկական Կարիտաս ԲՀԿ
2012թ․- Կանանց համար տնայնագործական աշխատանքի հնարավորության ստեղծում Գետիկ համայնքում - Հայկական Կարիտաս ԲՀԿ
2013թ․ - Կանանց համար տնայնագործական աշխատանքի հնարավորության ստեղծում Դպրաբակ համայնքում - Հայկական Կարիտաս ԲՀԿ, Վորլդ Վիժն Հայաստան



ԱՆՑՆԵԼ ԳՆՈՒՄՆԵՐԻ →